საქართველოს შოთა რუსთაველის თეატრისა და კინოს სახელმწიფო უნივერსიტეტმა ნართების თქმულებების პირველ თეატრალურ წარმოდგენას უმასპინძლა. უძველესი კავკასიური ეპოსი ახალგაზრდა მსახიობების ჯგუფმა ქართულ და ოსურ ენებზე გააცოცხლა.
ნართების თქმულებების თეატრალური ვერსია 2018 წლის ზაფხულში „კავკასიური მოზაიკის“ ინიციატივით შეიქმნა. თეატრალური ადაპტაციის შექმნაში მონაწილეობა მიიღეს საქართველოს შოთა რუსთაველის თეატრისა და კინოს სახელმწიფო უნივერსიტეტის სტუდენტებმა. თეატრალური წარმოდგენის შექმნის იდეას წინ უძღოდა ნართების თქმულებების ქართულ-ოსური ბავშვებისათვის ადაპტირებული ილუსტრირებული ვერსიის გამოცემა 2017 წელს.
„კავკასიური მოზაიკის“ ხელმძღვანელის, ნაირა ბეპიევის განცხადებით, აღნიშნული სპექტაკლი სამშვიდობო ინიციატივის გაგრძელებაა.
„სპექტაკლი, რომელსაც წარმოვადგენთ, არის გაგრძელება იმ სამშვიდობო ინიციატივისა, რომელიც ერთობლივად ხორციელდება. მინდა გითხრათ, რომ აქ ჩართულები არიან ქართველი და ოსი ახალგაზრდები. ვფიქრობ, ეს იქნება ქართველებისა და ოსების ურთიერთთანამშრომლობის კიდევ ერთი მაგალითი“, – განაცხადა ნაირა ბეპიევმა.
სპექტაკლის რეჟისორის, თამარ ხიზანიშვილის თქმით, სპექტაკლი ერთგვარი სამშვიდობო გზავნილია.
„ნართების ეპოსი გახლავთ ზოგადკავკასიური თემებით სავსე ეპოსი, რომელიც მგონია, ემსახურება ქართულ-ოსური ურთიერთობების რაღაც ახალ ნაბიჯებს. შეიძლება ჩაითვალოს, რომ ოსებისათვის ეს არის ერთგვარი მშვიდობის გზავნილი“, – აღნიშნა თამარ ხიზანიშვილმა.
ნართების თქმულებების ადაპტირებას, გამოცემასა და თეატრალურ სცენაზე გაცოცხლებას მხარი დაუჭირეს ევროკავშირმა (EU) და გაერო-ს განვითარების პროგრამამ (UNDP) მათი ერთობლივი ინიციატივის ფარგლებში, რომელიც კონფლიქტის შედეგად გამიჯნულ საზოგადოებებს შორის ნდობის აღდგენას ემსახურება (ნდობის აღდგენისა და ადრეული რეაგირების მექანიზმი – COBERM).
