სამხრეთ ოსეთის ადმინისტრაცია შეუერთდა დედაქალაქის ყოველწლიურ ღონისძიებას – „თბილისობის“ დღესასწაულს. დღესასწაული გ. ჩიტაიას სახელობის ეთნოგრაფიული მუზეუმის ტერიტორიაზე მდებარე ოსური სახლის ეზოში აღინიშნა.
![](http://soa.gov.ge/wp-content/uploads/2023/09/1-7-1-1024x768.jpg)
ღია ცის ქვეშ მოეწყო ოსი და ქართველი მხატვრების ნამუშევრების გამოფენა.
დღესასწაულის სტუმრებს ადგილზე ოსური სახლის ყოფა – კერა, ოჯახის უფროსის სკამი, მაგიდა, სადაც სუფრა იშლებოდა, ლუდის ტრადიციული თასი – უაცამონგა, გმირობისა და ვაჟკაცობის სიმბოლო დახვდათ. ასევე, უძველესი სათავსო, ოსური აკვანი – ავდანი, იმდროინდელი საყოფაცხოვრებო ჭურჭელი და საუკუნის წინ ნაქსოვი ხალიჩა.
![](http://soa.gov.ge/wp-content/uploads/2023/09/1-8-1-1024x768.jpg)
![](http://soa.gov.ge/wp-content/uploads/2023/09/1-62-1-1024x768.jpg)
ოსურ სახლში სტუმრებს შეეძლოთ დაეთვალიერებინათ უძველესი ხის კასრი, სადაც ჩვეულებრივ ინახებოდა მარცვლეული ან ფქვილი და ასევე უძველესი სპილენძის ქვაბი, სადაც ლუდს ადუღებდნენ.
![](http://soa.gov.ge/wp-content/uploads/2023/09/1-59-1-1024x768.jpg)
ოსური ოჯახის ყოფას გაეცნენ მაღალი დონის სტუმრები – საქართველოს პარლამენტის ვიცე-სპიკერი გია ვოლსკი, აფხაზეთის ავტონომიური რესპუბლიკის მთავრობის თავმჯდომარე რუსლან აბაშიძე, საქართველოს მეცნიერებათა აკადემიის პრეზიდენტი როინ მეტრეველი, თსუ-ის ქართულ-ოსური კვლევითი ცენტრის დირექტორი – ივ. ჯავახიშვილის სახელმწიფო უნივერსიტეტის ქართულ-ოსურ ურთიერთობათა სამეცნიერო-კვლევითი ცენტრის დირექტორი ნაირა ბეპიევი, საქართველოში ევროკავშირის სადამკვირვებლო მისიის წარმომადგენლები და სხვა პატივცემული სტუმრები, რომლებსაც პირადად დახვდა სამხრეთ ოსეთის ადმინისტრაციის ხელმძღვანელი ბატონი თამაზ ბესტაევი.
![](http://soa.gov.ge/wp-content/uploads/2023/09/1-13-1-1024x768.jpg)
![](http://soa.gov.ge/wp-content/uploads/2023/09/1-15-1-1024x768.jpg)
![](http://soa.gov.ge/wp-content/uploads/2023/09/1-17-1024x768.jpg)
![](http://soa.gov.ge/wp-content/uploads/2023/09/1-30-1-1024x768.jpg)
სტუმრებს ოსური მისასალმებელი ხალხური სიმღერითა და ტრადიციული ლუდის თასითა და სამი ოსური ხაჭაპურით დახვდნენ.
![](http://soa.gov.ge/wp-content/uploads/2023/09/2-1024x934.jpg)
![](http://soa.gov.ge/wp-content/uploads/2023/09/4-785x1024.jpg)
![](http://soa.gov.ge/wp-content/uploads/2023/09/6-936x1024.jpg)
სტუმრების წინაშე წარდგნენ ხალხური სიმღერისა და ცეკვის აკადემიური ანსამბლ ,,ნართების“ მოცეკვავეები და ვოკალისტები. გაჟღერდა ოსური და ქართული სიმღერები, ასევე შესრულდა ოსური ცეკვა „ხონგა“.
სტუმრების ნაწილმა დამსწრე საზოგადოებას მისასალმებელი სიტყვით მიმართა – ბატონმა როინ მეტრეველმა და ქალბატონმა ნაირა ბეპიევამ.
![](http://soa.gov.ge/wp-content/uploads/2023/09/1-34-1024x768.jpg)
„თბილისობა“ ოსურ სახლში ინტერაქტიული იყო – თითოეულ დამსწრე მამაკაცს შეეძლო წვლილი შეეტანა ადგილზე მოსამზადებელი ოსური ლუდის ხარშვის პროცესში – მათ ქვაბში ალაოს მოურიეს. აღსანიშნავია, რომ ოსური ლუდის ხარშვა დიდ პატივად ითვლებოდა და ამ პროცესს მხოლოდ გამორჩეულ და პატივცემულ ადამიანებს ანდობდნენ.
![](http://soa.gov.ge/wp-content/uploads/2023/09/1-24-2-768x1024.jpg)
![](http://soa.gov.ge/wp-content/uploads/2023/09/1-28-2-1024x768.jpg)
![](http://soa.gov.ge/wp-content/uploads/2023/09/1-32-2-768x1024.jpg)
დღესასწაულის სტუმრებისთვის განსაკუთრებით ემოციური ცეკვა ,,სიმდის“ საერთო შესრულება აღმოჩნდა. ამით სიმბოლურად ხაზი გაესვა დღესასწაულის მთავარ იდეას – საქართველოს ერთიანობას.
![](http://soa.gov.ge/wp-content/uploads/2023/09/1-45-1024x768.jpg)
ოსური სახლის ეზოში, „თბილისობის“ დასასრულს, სტუმრებს ელოდებოდა სუფრა ტრადიციული ოსური კერძებით, რომლებიც ასევე ადგილზე დამზადდა: სამი ხაჭაპური, ჯიგკა და ოსური ლუდი.
![](http://soa.gov.ge/wp-content/uploads/2023/09/1-42-1-1024x768.jpg)
აღსანიშნავია, რომ „თბილისობა“ ოსურ სახლში პირველად აღინიშნა. სადღესასწაულო ღონისძიების ორგანიზატორია სამხრეთ ოსეთის ადმინისტრაციის კულტურისა და სპორტის სამსახური და ადმინისტრაციის განათლების სამსახური.